رحلة إلى الأدغال .. الجزء الأول

[راسبوتين]

السلام عليكم ..

مساء الورد والياسمين لأحلى قراء ومتابعين ..
وصباح الفل والزعفران لأحلى صباحيين ..

اليوم جايبلكم قصة حلوة .. ان شاء الله تعجبكم ..
فيها شيء من الظرافه .. وشيء من الاثارة .. وشيء من الاستمتاع والترفيه ..

اللي طفشان يقراها .. واللي ضايق خلقه يقراها .. لانها بالتاكيد بتوسع خاطره ..

وأحسن ما فيها انكم انتم ابطالها يا حلوين .. وعذرا على من لم يكن من الاعضاء معنا لأمرين القصة ما تتحمل اشخاص كثيرين ، وكذلك العتب على الذاكرة ما تذكرت اللي كتبتهم ( يعني قروبي القديم ) .

الأجزاء خمسة .. كل جزء أحسن من الثاني ان شاء الله .. والايام اللي يكون فيه جزء جديد هي : الاثنين والخميس .. يعني اسبوعين واحنا مخلصين هالقصة ..

واللي عنده اختبارات والا ماهو فاضي له خيارين : اما انه يدخل على القصة ويحفظها عنده .. أو يقراها بعدين ..

ما اطول عليكم أتركم منع القصة ..


رحلة إلى الأدغال ... الجزء الأول


أبطال القصة :

بيوك : قائدة الفريق .. وتتمع باتخاذ القرار السريع .
الذيب : نائب القائد والمستشار الحكيم .
راسبوتين : الشخصية الساخرة في الفريق ، لكنه يفك ازمات .
نسايم : شخصية عصبية لكنها مناضلة وقرارها فاصل .
نايف : شخصية هادئة ومفكرة .
ملكة الصمت : شخصية مثقفة وسريعة البديهة
خالد : شخصية مقاتلة ، لا شيء يعيقها .


القصة ..............

- 1-
بدأ الصباح ممل على غير العادة في أول شهر من الاجازة ، لكن ذلك ضريبة الاجازة عقب الدراسة ..
كانت ملكه ونسايم يعدون الفطور ، والذيب وبيوك ونايف في غرفة الاشراف يجهزون ويعدون الأمور ويشوفون وش الأحداث وكيف بتكون الاجازة ، وأما خالد وراسبوتين ففي الحوش طاقينها تمارين ومضاربات ..
طلعت ريحة الفطور .. فقال خالد : ياااه وش هالريحة ما احلاها .. من زمان ما كلينا ..
قال راسبوتين : كيييف ؟ من زمان ما كلينا يالدب ؟؟ ما ادري من اللي أكل الهامبورقر حقي البارح ..
فتح خالد فمه وقال : شوف ناظر تشوف شي؟؟ تراها نسايم اللي اكلته ..
مسك راسبوتين خشمه وقال : سكر فمك .. وععععع .. ريحتك صاكه خشمي ..
قال خالد : صح نسيت باقي ما افطرنا ..
هنا نادت ملكة على الجميع : ياااااااااشباب الفطور جاهز .. ياللا قبل ما يبرد ..
وماهي الا لحظات الا والشباب ملتمين حول السفره ..
قال الذيب : تسلم الايدين اللي سوت الفطور ..
قال راسبوتين : أي والله .. الايدين هذي فيها ريحة هامبورقر .
قالت نسايم : وش تقصد يعني ؟؟؟
قال راسبوتين : ابد ما اقصد الا هالفم اللي كانه كم باكستاني ..
قالت نسايم : ايييييييييش ؟؟؟ تكفى انت ووجهك اللي تقول منحدر خطير ..
وتقوم بينهم مضاربه وما تشوف الا الملاعق والصحون تتطاير .. والشباب اللي يشجع واللي يحاول فك النزاع ..
وجات بيوك وقالت : وجعععععع يا راس .. ما امداني اروح اغسل ايديني حتى تضارب هالمسكينة ..
قال راسبوتين : ام التعصب يا شيخ .. شكلك اتحادية مع نسايم ..
قالت بيوك : خلاص خلاص .. اعقلوا وافطروا ..
وافطر الشباب .. وكل واحد ملا معدته صح ..

قالت بيوك للشباب : اليوم الظهر ابغاكم كلكم متواجدين لا أحد يروح يمين والا يسار .. فاهمين ؟!!
ناظر خالد في راسبوتين وقال : راح علينا القيم ، فكك ربي .
قال راسبوتين : فكني الله ؟؟ والله ما ندري من اللي فكه الله من الثاني ..
نقفزت نسايم وقالت : طيب بيوك ما يمديها تخلينها بين المغرب والعشاء !!
قالت بيوك : ابدا .. الظهر يعني الظهر ..
قالت ملكة : طيب الغداء بنسوية والـ ..
قاطعتها بيوك : ما عليك من الغداء بتسويه الخدامه ..
قال راسبوتين : من تقصدين نسايم ؟؟
ما امدى راسبوتين يخلص كلمته والا وياكل ذيك اللكمة من نسايم اللي شمرت عن يديها وتعال ضرب في راسبوتين اللي صار يدافع عن نفسه .. وضربه من هنا وضربه من هناك وتثبيت وفك و..
طلع الذيب من طوره وقال : الله يقلع البزران لمن ينعطون وجه .. والله لمن تعقلون لمحطكم بالعقال !!
هجد الجميع واعلنت الرايات البيضاء ..
قامت بيوك وقالت : موعدنا الظهر .. لا أحد ينسى ..

- 2-
بعد الظهر اجتمع الشباب وكل واحد بدا يفكر في الموضوع اللي تبغاهم فيه بيوك .. خالد قال في نفسه اكيد تبي تشتري لي بدله رياضية جديده أكيد شافت رياضتي القديمة المشققة ورحمت حالي .. وملكة قالت في نفسها أكيد تبي تجيب لي كتب جديدة وروايات علشان هي تعرف من زماان ما جددت مكتبتي .. ونسايم قالت في نفسها اكيد تبي تجيب لي طقم مكياج جديد اصل مكياجي صار قديم .. ونايف قال في نفسه بس هذي ما يبي لها كلام اكيد بتجيب لي كرز كامل دخان ، اف لو يكون دانهيل او دوفي دوف .. وراسبوتين قال : اكيد بتجيب لي افلام جديده كل الأفلام اللي عندي عدتها عشرين الف مره .. وبدا كل واحد يسرح في تخيلاته ..
قاطعتهم بيوك بدخلتها هي والذيب وقالت : ماشاء الله عليكم دقيقين في المواعيد ..
قال خالد : البركة فيك ..
قالت بيوك : انا اجتمعت فيكم اليوم علشان نتناقش في موضوع الصيفية هذي .
قالت ملكة : اكيد ناوية على سفرية ؟؟
قالت بيوك : ايوه صحيح ..
قاموا الشباب كلهم فرحانييين .. تعيييييييش بيوك .. اوه اوه .. تعيييييييش بيوك اوه اوه .. وانقلب الوضع تشجيع .. ما كان ناقصهم الا رابطة تشجيع ..
قال الذيب : هيييييي يا قرود باقي ما بدينا ، اجلسوا ..
جلس الجميع فاكملت بيوك : بس انا والذيب ما اتفقنا على مكان !! وقلنا نشوف الشباب وين يبون ؟؟
قال راسبوتين : ما في غيرها مصر .
قالت ملكة الصمت : مليييينا من مصر كل صيفيه واحنا فيها .. لو نروح لدبي احسن .
قالت نسايم : لا دبي ولا هم يحزنون ، اشوف نروح لباريس .
قال خالد : انا ابي الصين .
قالت نسايم : ايييش الصين ؟؟ ما كفاك اللي سويته لنا فيها ؟؟ ( ستاتي قصة خالد في رحلته الى الصين في قصة مستقلة .. ساكملها لكم ) .
ودار نقاش حاد ومزعج بين الشباب ..
صاحت بيوك : يووووه اصلا من اللي قالي اعطيكم وجه ..
وناظرت في الذيب وقالت : وش رايك ؟
قال الذيب : والله ما عندي شي معين و ..
قال نايف بهدوء : بس .. لقيتها .. خلوها عندي .
سكت الشباب كلهم .. ثم قالوا : أخيرا تكلمت ..
قال نايف : لو فكرنا زين كان عرفنا ان هذه رحله مو تمشية .
قال راسبوتين : طيب خير يا طير نفس الشيء الرحلة تمشية .. زي ما تقول دجاجة ورز أو رز ودجاجة .
قال نايف : نو نو عفوا ماي دير .. فيه فرق .. ممكن نستعين بمثقفتنا ملكة ..
قالت ملكة الصمت : صحيح .. الرحلة فيها تخييم وجلسة طويلة شوي في مكان واحد ، أما التمشية فهي التنقل من مكان لثاني ..
قالت نسايم : طيب وبعدين ؟؟
قال نايف : يعني المكان اللي باقترحه هو المناسب .
قال خالد : لا تقول نخيم في الربع الخالي ؟؟
ضحك نايف على هدوء وقال : لا يا خالد ما راح نخيم في السعودية ..
استغرب الجميع .. فقالت بيوك : وين تبينا نخيم ؟؟
قال : في أحد الجزر البعيده ..
قالو الشباب : ايييييييييييييييش ؟؟
قال نايف : نشوف لنا جزيرة خارجية ونخيم فيها اسبوع او اسبوعين .
قال الذيب : لكن فيها خطورة .. الجزر فيها مخاطر ..
قال خالد : بالعكس هذي حلات الرحلة .. تذكرون يوم كنت في الصين يوم كنت في الجزيرة و .. ( ما نحرق الفيلم تتابعون احداث كلام خالد في القصة القادمة رحلة الى بلاد الصين ) .
قال الذيب : بس شي عن شي .
قالوا الشباب : لا ما نبي الا اللي قاله نايف ..
وبدأت الأصوات تعلوا بين الذيب والشباب و..
قالت بيوك : اوكي موافقه ..
فرحوا الشباب واستانسوا ..
قالت بيوك : كل واحد يضبط اغراضه وشناطه حتى نتجهز للرحلة بعد ثلاثة أيام .
والتفتت للذيب وقالت : ها يا ذيبنا توكل على الله وخلص جوازات الشباب علشان نكون جاهزين .
رد الذيب في تضايق وقال : ابشري .. بس لا تقولي لي ان كنت موافقكم على الرحلة ..
قالت بيوك : توكل على الله يا رجال ..

- 3 -

بعد ثلاثة ايام ..
كان الشباب جاهزين تماما .. وكانت التاشيرات والجوازات خالصة ..
ركبوا سيارتهم وعلى طول على المطار ..
صعد الشباب الطائرة .. واستمعوا لنداء كابتن الطائرة المنادي لربط الأحزمة ايذانا بالاقلاع ..
اقلعت الطائرة متوجهة الى الجزيرة اللي اختاروها .. لكن الطائرة لن تهبط في الجزيرة ذاتها انما في البلاد المجاورة لها .. ومن ثم يذهب الشباب عن طريق البحر الى جزيرتهم المنشودة ..
استمرت الطائرة عشر ساعات محلقة .. ونصف لكم حال الشباب فيها :
الذيب وبيوك : كانوا يراجعون برامج الرحلة وترتيباتها بالكامل ..
نسايم وملكة : ما خلوا من مجلة ولا جريدة الا وقروها بالكامل ، وقاعدين يحشون في خلق الله اللي في الطايرة .
نايف : قاعد يدخن ويفكر ويتأمل في المضيفات وفي الركاب ..
راسبوتين وخالد : كل واحد منهم شخيره يوصل لآخر الطائرة من قوة النوم .. واللي يشوفهم يقول مانامو من اسبوعين .. بس ما ينلامون لهم ثلاثة ايام ما ناموا من الفرحة ..

ونزلت الطائرة في المطار المحدد لها .. وخرج الشباب منها متوجهين لأقرب ليمزين يوصلهم للميناء للعبور منه إلى الجزيرة .. وصلوا الميناء لكنهم متاخرين .. سألوا المسؤولين هناك : قالوا السيفنة تحركت للجزيرة قبل ساعة وما بترد الا بعد يومين ..
قال راسبوتين : وش هذي السفينة ؟؟ لا يكون الركاب قاعدين يدفون السفينة ؟
قالت نسايم : اسكت بس مو وقته ..
قالت بيوك للذيب : طيب وش نسوي ألحين ؟؟
قال الذيب : ما معنا الا نستاجر قارب يكون معنا طوال اسبوعين ..
قالت ملكة : احسن حتى لمن نبي شيء نرجع فيه ما ننتظر السفينه .
قالت بيوك: على بركة الله ..
ثم قالت لخالد : يالله يا خالد رح شف لنا قارب ممتاز نروح فينا ..
قال خالد : اوكي ..
التفت خالد على راسبويتن وغمز له بعينه وقال : يالله يا بو الشباب اطلع معي ..
وترافق الاثنين في البحث عن يخت مناسب ..
وبعد مضي ثلاث ساعات ..
جاء خالد وراسبوتين ومعاهم مفاتيح اليخت ..
قالت بيوك : هاه وش سويتوا ؟؟
قال خالد : استاجرنا يخت لمدة اسبوعين ..
قالت بيوك : بسواقه ؟؟
قال خالد : لا .. انا اعرف اسوقه .. والا نسينا ؟؟
قالت بيوك : اوكي ..
وتوجه الشباب لليخت وحملوا اغراضهم وامتعتهم وجميع متعلقات رحلتهم ..
وانطلقوا بالقارب نحو الجزيرة ..
الجزيرة التي تخبيء لهم الكثير ..
الكثير من المفاجاءات ..
..

انتهى الجزء الأول ..

[سونهام يغمور]

بصراحه
....
ليه انا و الذيب على طول مع بعض ماعرف اسوي شي لوحدي
و ليه دايما نسايم و ملكه هم اللى يحضرون الاكل
ما احب طبخهم ماسخ
وووووع بطني اه بطني


لا و كله كوم و نايف كوم

حتى المضيفات ما رحمتهم ترا يعملون فينا مقلب في رحلة العوده

و الله اسلمك للكابتن



مشكور راس

في انتظار الخميس:36_7_10[1]:

[راسبوتين]

و الله من ناحيتك انت والذيب سوى فلسببين :
لأنه المستشار .. وثانيا لأنه نشب في حلقي ما لقيت له دور ممتاز .. بس تابعوا القصة وبتشوفون ..

ومن ناحية ملكة ونسايم :
فجات كذا ما قصدت .. ومن ناحية أكلهم فانا كنت عارف ان نسايم وملكة ما عندهم سالفه في الطبخ علشان كذا ورطتهم في هالمهمة >>> نسايم الهامبورقر حقي انتي أكلتيه والا لا ؟؟

وأما نايف .. فما ادري فشلنا في الطايرة كل شوي يناظر في المضيفات ما ادري ليه ؟؟ الله يهديه بس .

وشكرا عل المرور ..

[سونهام يغمور]

راسبوتين

اصلا نسايم ما تحب الهمبرغر

بس انا اشوف بقعه كتشب على ثوب الذيب

ما ادري؟؟؟

[راسبوتين]

يسويها الشايب ..

لسا ما حققنا في الموضع ..

بس يالله نتنازل ..

لاتجيب سيرة هرجة الصين يرحم والديك

ترى بعض الاعضاء جدد ولايعرفونها

لاتفضحنا تكفى

ههههههههههههههههههههه





-------------------------------------

في انتظار الخميس ,,,,


حييييييييييييييييييييط << وهذي تفحيطه بالقارب

<<< ياخي قالك قارب موب كامري !!!

[الأحيائية]

مبدع راسبوتين... سيناريو وحوار رااائع والقصة حلوووة.. <<< ياليتني معاهم

واحلى شي نايف.. في كل مكان يدخن

[سونهام يغمور]

فاضحنا هالنايف و الله !!!!

ياريت نسيبه في الجزيره

و لا يجي سبع ياكله

تكفي يا راس اذا مو في القصه ضيف عليها

خخخخخخخخخخخخخخخ

[نسايم]

هيييييييييييييييييييييييييييييييييييييييييي

ترى نايف لو سبتوه في الجزيره لحالها انا بجلس معاه
لسببين
السبب الاول راح احرمو من التدخين
السببن التاني راح اعلمو ما يطل في بنات الناس
خبركم الادغال حريمها من دولاك اللي يطبلو على الهاجر <<< يعني بزوج نايف وحده منهم خخخخخ

وبعدين سلمتي بيوك انا ما اكره في حياتي الا الهمبرجر والوجبات السريعه ماأكلها الا مطره
يعني رايك الذيب ما يبغى يعترف انو اكلها

راسبو ليش انا دايما اكفخ فيك لا يكون التايكوندو عامل عمايلو ؟؟؟ << بس وناسه متى اكفخ في خالد هع هع هع <<< شريره

[ملكــة الصــمت]

ههههههههههههههههههههههه

الله يرج ابليسك راس

من جد
لها وحشة قصصك الخنفشارية

نستنى الجزء التاني ...